JỌN CHAPTA 1
Di Wọd Wee De Mek Pipul to Gẹt Laif
(Vas
1-18)
1. Fọ stat ọf ẹvritin di Wọn wee bi di Wọd bin dee. Di Wọd bin dee togẹda wit Gọd, an di Wọd na Gọd.
2. Di Wọd bin dee togẹda wit Gọd fọ stat ọf ẹvritin.
3. Gọd yuz di Wọd fọ mek ọl tins. An Gọd no mek enitin witaut di Wọd.
4. Laif bin kọm frọm di Wọd, an dis laif bi lait fọ pipul.
5. Di lait de shain insaid daknẹs, an daknẹs no fit kwẹnch am.
6. Wọn man dee, wee Gọd sẹnd. Di man nem na Jọn.
7. Im kọm fọ tẹl pipul wetin im no abaut di lait, so dat ọl pipul go hia im mẹsej an biliv.
8. Jọn imsẹf nọ bi di lait. Im kọm jọs to tẹl pipul abaut di lait.
9. Dis lait na di tru lait wee kọm fọ wọld an de shain ọn ọl pipul.
10. Di Wọd bin dee fọ wọld, an no mata see Gọd mek di wọld tru Am, stilyẹt pipul fọ wọld nọ no Am.
11. Im kọm fọ Im oon kọntri, bọt Im oon pipul no wẹlkọm Am
12. Bọt fọ ọl pipul wee wẹlkọm Am an wee put dẹm trọst fọ Am, Im mek dẹm to bikọm Gọd Im pikin-dẹm.
13. Dẹm no bikọm Gọd Im pikin-dẹm fọ di sem wee wee pipul de bikọm pikin-dẹm ọf dẹm papa an mama, wee bi, bai see dẹm bọn dẹm as pikin-dem ọf papa wee bi human bin. Na Gọd Imsẹf mek dẹm to bi Im pikin-dẹm.
14. Di Wọd kọm bikọm human bin an Im
liv wit ọs. Im sho ọs see Im laik ọs wẹl wẹl an Im dee kaind to ọs wẹl wẹl. An
Im mek ọs no di kọmplit trut abaut Gọd.
15. Jọn tọk abaut Am, an im kọm shaut strọng strọng de see, “Dis na di man wee a bin de tọk abaut Am wẹn a tọk see, ‘Pẹsin de kọm afta mi, bọt Im dee impọtant pas mi, bikọs Im bin dee bifọ mi a kọm dee.’ ”
16. Bikọs Im laik ọs wẹl wẹl, wi ọl dọn risiv bẹta tins an stil de risiv mọọ bẹta tins.
17. Gọd giv di Lọ tru Mosis, bọt na tru Jizọs Kraist na im Gọd sho ọs see Im laik ọs wẹl wẹl an Im sho di trut abaut Imsẹf.
18. Nobọdi dọn ẹva sii Gọd. Di onli
Sọn, wee bi di sem as Gọd, an wee Im an Im Papa dee tait wẹl wẹl, na Im dọn mek
pipul to no Gọd.
Mẹsej Wee Jọn Wee De
Baptaiz Pipul Giv
(Vas 19-28)
(Matiu 3:1-12; Mak 1:1-8; Luk 3:1-18)
19. Dis na wetin Jọn tọk wit im maut wẹn Judia pipul dẹm big ọga-dẹm fọ Jẹrusalẹm sẹnd prist-dẹm an Livait-dẹm to aks Jọn see, “Na hu yu bi?”
20. Jọn no tọk see im nọ go ansa, bọt
im tọk plen plen wit im maut see, “Mi a nọ bi di Kraist.” 21. Dẹm aks am see, “Na hu yu bi nau?
Abi yu bi Ẹlaija?”
Im ansa see, “A nọ bi Ẹlaija.”
“Abi yu bi di Prọfẹt?”
Im ansa see, “No.”
22. Dẹm kọm aks am see, “Dẹn na hu yu
bi? Mek wi gẹt ansa fọ kari go giv pipul wee sẹnd ọs. Na wetin yu tọk abaut
yọsẹf?”
23. Jọn ansa bai to tọk wẹtin prọfẹt
Aizaya tọk de see, “A
bi di vọis ọf pẹsin wee de shaut fọ dẹzat
de see:
‘Mek una mek stret rod fọ di Lọd to travul!’ ”
24. Na pipul wee dee Farisii grup sẹnd di mẹsẹnja-dẹm.
25. Dẹm aks Jọn see, “Na wetin mek yu de baptaiz pipul, if yu nọ bi di Kraist ọọ Ẹlaija ọọ di Prọfẹt?”
26. Jọn ansa dẹm see, “Mi a de baptaiz pipul wit wọta, bọt wọn pẹsin dee fọ una midul an una nọ no Am.
27. Im go kọm afta mi, bọt a no ivun rich to luz di rop ọf Im shu kọmọt.”
28. Dis tins hapun fọ Bẹtani, fọ di
ọda said ọf Riva Jọdan, wia Jọn bin de baptaiz pipul.
Di Wọn Wee De Kọmọt Di
Bad Tins Wee Pipul Fọ Wọld Dọn Du
(Vas 29-34)
(Jọn 1:15)
29. Di nẹst dee, Jọn sii Jizọs de kọm wia im dee, na im Jon tọk see, “Dis na Gọd Im Shiip-pikin wee de kọmọt di bad tins wee pipul fọ dis wọld dọn du!
30. Dis na di Pẹsin wee mi a tọk abaut Am wẹn a tọk see, ‘Wọn Pẹsin de kọm afta mi bọt Im dee impọtant pas mi bikọs Im bin dee bifọ a kọm dee.’
31. Mi masẹf nọ no Am, bọt a kọm kọm de baptaiz pipul wit wọta so as to mek Izrẹl pipul no Am.”
32. Jọn tọk mọọ abaut wetin im dọn sii de see, “A sii di Spirit as Im de kọm daun frọm hẹvun laik dov an rimen wit Am.
33. Mi masẹf stil nọ no Am, bọt Gọd wee sẹnd mi to baptaiz pipul wit wọta bin tẹl mi see, ‘Di Pẹsin wee yu go sii di Spirit kọm daun an rimen wit Am, na Im bi di Pẹsin wee de baptaiz pipul wit di Holi Spirit.’
34. Mi a dọn sii an a de tẹl una see dis Man na Gọd Im Sọn.”
Di Fẹst Pipul wee de
lẹn an fọlo Jizọs Im wee
(Vas 35-42)
35. Di nẹst dee agen, Jọn bin de stand
wit tuu ọf di pipul wee de lẹn an fọlo im wee,
36. na im im sii Jizọs de waka de go. Jọn kọm tọk see, “Dat na Gọd Im Shiip-pikin!”
37. Di tuu pipul wee de lẹn an fọlo Jọn im wee bin hia wẹn Jọn tọk dis tin, na im dẹm kọm fọlo Jizọs.
38. Jizọs kọm tọn an Im sii dẹm de fọlo Am, na im Im aks dẹm see, “Na wetin una de faind?”
An dẹm ansa Am see, “Rabai, (wee min ‘Ticha’), na wia Yu de stee?”
39. Im tẹl dẹm see, “Mek una kọm sii.” Na im dẹm go wit Jizọs an dẹm sii wia Im de stee an dẹm stee wit Am sotee di rimenda ọf dat dee finish. Dis na bikọs na araund fọọ o’klọk fọ ivnin.
40. Andru wee bi Saimọn Pita im brọda, bi wọn of di tuu pipul wee hia wẹn Jọn bin tọk, an dẹm fọlo Jizọs.
41. Di fẹst tin wee Andru du na to faind im brọda Saimọn an im tẹl am see, “Wi dọn sii di Mẹzaya.” (Dis wọd min “Kraist.”)
42. An im bring Saimọn to Jizọs. Jizọs luk am an Im tọk see, “Yu bi Saimọn, an yọ papa nem na Jọn, bọt dẹm go de kọl yu Kẹfas. (Dis na di sem nem as Pita an i min “Rọk.”)
Jizọs Kọl Filip an
Nataniẹl
(Vas 43-51)
43. Di nẹst dee, Jizọs kọm disaid to go Galili. Im kọm sii Filip an Im tẹl am see, “Fọlo Mi.”
44. Filip na frọm Bẹtsaida, wee bi Andru an Pita dẹm taun.
45. Filip faind Natanẹl an im tẹl am see, “Wi dọn sii di Pẹsin wee Mosis rait abaut Am fọ di buk ọf di Lọ an wee di prọfẹt-dẹm rait abaut Am tuu. Im bi Jizọs wee frọm Nazarẹt, an im bi
Josẹf im Pikin.
46. Natanẹl aks am see, “Eni bẹta tin fit kọmọt frọm Nazarẹt so?”
Filip ansa am see, “Mek yu kọm sii.”
47. Jizọs sii Natanẹl de kọm to Am, na im Im tọk abaut am de see, “Dis na kọrẹkt Izrẹl pẹsin. Im no gẹt eni mago mago karakta!”
48. Natanẹl aks Am see, “Na hau Yu tek no mi?”
Jizọs ansa am see, “A sii yu wẹn yu dee ọnda fig trii bifọ Filip kọl yu.”
49. Natanẹl tẹl Am see, “Ticha, Yu bi Gọd Im Sọn. Yu bi Izrẹl King!”
50. Jizọs tẹl am see, “Na bikọs A tẹl yu see A sii yu wẹn yu dee ọnda fig trii na im mek yu biliv? Yo go sii tins wee pas dis wọn.”
51. An Jizọs tẹl dẹm see, “A de tẹl una tru see, “Una go sii hẹvun opun an Gọd Im enjẹl-dẹm go de go ọp an kọm daun ọn tọp Man im Pikin.”
Go Fọ Jọn:
[Chapta 1] [Chapta 2] [Chapta 3] [Chapta 4] [Chapta 5]
[Chapta 6] [Chapta 7] [Chapta 8] [Chapta 9] [Chapta 10]
[Chapta 11] [Chapta 12] [Chapta 13] [Chapta 14] [Chapta 15]
[Chapta 16] [Chapta 17] [Chapta 18] [Chapta 19] [Chapta 20]
[Chapta 21]
