JỌN CHAPTA 2
Di Wẹdin Wee Dẹm Du Fọ Wọn Taun Wee Im Nem Na Kena
(Vas 1-12)
1. Fọ tọd dee, wọn wẹdin kọm dee fọ
wọn taun wee im nem na Kena an wee dee fọ Galili. Jizọs mama bin dee dia.
2. Dẹm ọlso kọl Jizọs an di pipul wee de lẹn an fọlo Im wee mek dẹm kọm fọ di wẹdin an dẹm bin dee dia.
3. Wẹn wain finish, Jizọs mama kọm tẹl Am see, “Dẹm no gẹt wain.”
4. Jizọs tẹl am see, “Mama, yu mọst to nọt tẹl Mi wetin A go du. Ma taim nẹva rich.”
5. Jizọs mama kọm tẹl di savant-dẹm see, “Mek una du entin ma Pikin tẹl una to du.”
6. Siks wọta pọt wee dẹm mek wit ston bin dee dia. Wọn pọt fit kari araund twẹnti ọọ taati galọn wọta. Na di pọt wee Judia pipul de put wọta wee dẹm de tek wọsh dẹm bọdi fọ di wee wee dẹm Lọ tọk.
7. Jizọs tẹl di savant-dẹm see, “Mek una ful di wọta pọt-dẹm wit wọta.” Dẹm ful wọta fọ di pọt-dẹm sotee wọta rich di pọt dẹm maut.”
8. Na im Im kọm tẹl dẹm see, “Ọya, mek una drọọ wọta kọmọt an tek am go giv di man wee dee in chaj ọf chọp fọ di wẹdin.” Dem tek di wọta to am.
9. Wẹn di man test am, di wọta dọn tọn into wain. Im nọ no wia di wain frọm kọm (bọt di savant-dẹm wee drọo di wọta kọmọt no). Na im im kọm kọl di man wee de mari waif niu
10. an im tẹl am see, “Ẹvri pẹsin de fẹst sav di bẹta wain, an afta pipul dọn drink plẹnti, na im im go sav di wain wee no fain. Bọt yu dọn kiip di bẹta wain go rich nau!”
11. Dis na Jizọs Im fẹst mirakul, an Im du am fọ Kena wee dee fọ Galili. Fọ dia, Im sho as Im tek dee wọndaful, an di pipul wee de lẹn an fọlo Im wee kọm trọst Am.
12. Afta dis, Jizọs kọm go Kapanọm wit
Im mama an Im brọda-dẹm an di pipul wee de lẹn an fọlo Im wee, an dẹm stee dia
fọ sọm dez.
Jizọs Draiv Pipul Wee
De Spọil Gọd-Im- Holi-Haus
(Vas 13-22)
(Matiu 21:12-13; Mak 11:15-17; Luk
19:45-46)
13. Na niali taim fọ Judia pipul dẹm Pasova Fẹstival, na im Jizọs kọm go Jẹrusalẹm.
14. Fọ insaid Gọd-Im-Holi-Haus, Jizọs sii pipul wee de sẹl kau-dẹm, shiip-dẹm, an pijin-dẹm, an pipul wee de chenj chenj mọni tuu as dẹm sidọn de du dẹm biznẹs.
15. Na im Jizọs tek rop kọm mek ken an Im draiv ọl di shiip-dẹm an kau-dẹm kọmọt fọ Gọd-Im-Holi-Haus. Im push push daun di tebul-dẹm ọf di pipul wee de chenj chenj mọni an skata dẹm kọins.
16. An Im tẹl di pipul wee de sẹl pijin-dẹm see, “Mek una tek dis tins kọmọt fọ hia. Mek una nọ de mek Ma Papa haus to bi makẹt.”
17. Di pipul wee de lẹn an fọlo Im wee kọm rimẹmba see, dẹm rait fọ Gọd-Im-Holi-Buk see, “Di wee wee A tek laik Yọ haus de bọn insaid Mi laik faya.”
18. Na im Judia pipul dẹm big ọga-dẹm kọm kwẹshọn Jizọs de see, “Na wich kain mirakul Yu fit du fọ tek sho ọs see Yu gẹt pawa fọ du dis tins?”
19. Jizọs ansa dẹm see, “Mek una brẹk daun dis Holi Haus ọf Gọd an A go bild am bak fọ trii dee.”
20. Judia pipul dẹm big ọga-dẹm kọm aks Am see, “Na fọọti siks yiẹ i tek to bild dis Holi Haus ọf Gọd an Yu go bild am bak fọ trii dee?”
21. Bọt Jizọs bin de tọk abaut Gọd-Im-Holi- Haus wee bi Im oon bọdi.
22. So, wẹn Gọd rez ọp Jizọs frọm dai,
di pipul wee de lẹn an fọlo Jizọs Im wee kọm rimẹmba see Jizọs bin dọn tọk dis
tin, an dẹm kọm trọst wetin dẹm rait fọ Gọd-Im-Holi-Buk an wetin Jizọs tọk.
Jizọs No Wetin Dee Insaid Ẹvribọdi Hat
(Vas 23-25)
23. Wẹn Jizọs dee Jẹrusalẹm fọ Pasova Fẹstival taim, plẹnti pipul trọst Am wẹn dẹm sii di mirakul-dẹm wee Im du.
24. Bọt Jizọs no kari Imsẹf trowee fọ dẹm, bikọs Im no ọl pipul,
25. Im no niid eniwọn to tẹl Am abaut
pipul, bikọs Imsẹf no wetin dee insaid pipul hat.
Gọ Fọ:
Jọn: [Chapta 1] [Chapta 2] [Chapta 3] [Chapta 4] [Chapta 5]
[Chapta 6] [Chapta 7] [Chapta 8] [Chapta 9] [Chapta 10]
[Chapta 11] [Chapta 12] [Chapta 13] [Chapta 14] [Chapta 15]
[Chapta 16] [Chapta 17] [Chapta 18] [Chapta 19] [Chapta 20]
[Chapta 21]
Go fọ Di Bẹta Nius
Abaut Jizọs Kraist as Jọn Tek Rait Am
Go bak fọ di Hom pej wee bi di Fẹst Pej fọ dis Websait
